+034 986 09 02 04 Sábado 14 de Decembro de 2019

Medio Rural consegue o compromiso das principais industrias lácteas para garantir a recollida a lo menos do mesmo volume de leite que no 2015


A conselleira mantivo unha rolda de contactos con todas elas co obxectivo de traballar en beneficio de todos os eslavóns e tratar de dar estabilidade ao sector

A conselleira do Medio Rural, Ángeles Vázquez, vén de manter nas últimas semanas unha rolda de contactos coas principais industrias lácteas que operan en Galicia, na que conseguiu que a meirande parte delas se comprometan a recoller este ano, cando menos, o mesmo volume de leite que o recollido no 2015.

Ángeles Vázquez felicítase polo compromiso acadado, posto que contribuirá a aportar unha maior seguridade ao sector produtor nun momento en que a Xunta é consciente do escenario complexo, cun gran aumento da produción fronte a un descenso do consumo. Por iso, esta rolda de encontros cos representantes industriais centrouse en solicitar responsabilidade a estes axentes da cadea de valor, coa finalidade de darlle estabilidade a un sector tan estratéxico como é o lácteo para Galicia.

As industrias lácteas que operan en Galicia e que amosaron a súa disposición a manter a recollida de leite son: Queserías Entrepinares S.A.U., Grupo Leche Río S.A., Grupo Lactalis (neste caso, o grupo garante a estabilidade dos volumes baseada na media das entregas dos últimos dous anos), Nestlé S.A., Grupo Danone, Celega S.L., Reny Picot, Corporación Alimentaria Peñasanta S.A., Feiraco S.C.G., Iparlat S.A., Logística Alimentaria S.L. e Leche Celta S.L., entre outras. Trátase das industrias que recollen o maior volume de leite na nosa Comunidade.

Traballo a prol do sector
Nesta liña, a conselleira sigue traballando a prol do sector lácteo galego a través dos distintos eidos. Deste xeito, manifestou a súa intención de continuar instando ao Goberno central a que prosiga co desenvolvemento e aplicación do Acordo Lácteo, co obxectivo de dotar de maior transparencia e estabilidade ao sector, con medidas como o Decreto de cesión de prezos, cuxa publicación urxe, e outras medidas legais e de fomento da actividade.

Así mesmo, a titular de Medio Rural viaxará a vindeira semana ata Bruxelas para reunirse co director de Desenvolvemento Rural da Comisión Europea e co director de Mercados, coa intención de trasladarlles a importancia de incrementar os controis sobre os mercados, que aínda que son libres, teñen que cumprir unha serie de esixencias.

Deja un comentario