+034 986 09 02 04 Sábado 20 de Xaneiro de 2018
DEPUTACIÓN PONTEVEDRA

A Deputación colaborará co concello de Pontecesures na creación dun premio de xornalismo vencellado ao escritor ‘Borobó’


O deputado de Cultura e Lingua mantivo unha xuntanza coa alcaldesa e coa concelleira de Cultura de Pontecesures para establecer as liñas de colaboración entre ambas Administracións en relación ao centenario do nacemento de Borobó
O deputado de Cultura e Lingua, Xosé Leal, mantivo esta mañá unha xuntanza coa alcaldesa de Pontecesures, Cecilia Tarela, e coa concelleira de Cultura, Maite Tocino, para establecer as liñas de colaboración entre o ente provincial e o Concello en relación ás actividades culturais coas que conmemorar o centenario do nacemento do escritor e xornalista Raimundo García, coñecido polo pseudónimo ‘Borobó’. Entre as actividades previstas, as representantes do Concello de Pontecesures anunciaron a súa intención de crear un premio de xornalismo vencellado a este persoeiro. Unha proposta que o deputado de Cultura e Lingua considerou de especial interese atendendo “á relación de Borobó coa lingua e a cultura galega e moi especialmente coa súa actividade durante a guerra e o fomento do emprego do galego a través do xornalismo”.
Segundo explicou a alcaldesa de Pontecesures, a estre premio poderán concorrer artigos publicados en galego durante os tres primeiros trimestres de 2016 e que estean vencellados coa Memoria Histórica. Tamén se valorará que os artigos presentados teñan algunha relación con Pontecesures e a súa comarca. Neste sentido, Cecilia Tarela sinalou que este certame “é unha iniciativa necesaria para poñer en valor unha figura senlleira como Borobó por todo o que significou para Pontecesures, e unha excelente oportunidade para promover e divulgar todo o seu traballo e compromiso a prol das liberdades”. Este premio contará cunha dotación económica que se fará pública no momento no que se presenten as bases.
Na xuntanza desta mañá, Xosé Leal volveu lembrar que un dos criterios que merecen especial consideración nas publicacións promovidas desde o Servizo de Publicacións da Deputación son precisamente as propostas relacionadas coa Memoria Histórica, polo que ofreceu a posibilidade de recoller nunha publicación específica unha selección dos artigos que se presenten ao premio.
Raimundo García Domínguez, coñecido polo pseudónimo ‘Borobó’, naceu en Pontecesures o 10 de xullo de 1916. Estudou Filosofía e Letras e durante a Guerra Civil defendeu a legalidade republicana, motivo polo que chegou a estar preso. Durante a súa extensa traxectoria xornalística destacou polo seu compromiso na difusión da cultura galega. Fundou a revista Chan, dirixiu publicacións como El Correo Gallego, e colaborou en La Vanguardia, ABC, Informaciones, Pueblo, El País, El Imparcial, El Sol ou La Tarde. Foi, ademais, biógrafo de figuras destacadas da cultura galega como Ramón Otero Pedrayo ou Castelao.

Deja un comentario