+034 986 09 02 04 Sábado 14 de Decembro de 2019
DEPUTACIÓN PONTEVEDRA

A campaña de Turismo Rías Baixas 2017 “Moito por descubrir” chega este mércores a Madrid da man da Deputación de Pontevedra


 

Carmela Silva presentará ante medios especializados e operadores turísticos estatais os reclamos turísticos da provincia neste ano 2017

A Presidenta da Deputación de Pontevedra, Carmela Silva, presentará este mércores día cinco en Madrid a campaña “Moito por descubrir. Rias Baixas por moitas razóns” coa que se promocionará a provincia como destino turístico ao longo de 2017. O acto vaise celebrar as 13.30 horas, na sede madrileña da Sociedade Xeral de Autores (SGAE), ante os medios de comunicación especializados e operadores turísticos da capital.

O evento contará coa presentación por parte da Presidenta da Deputación, Carmela Silva, de todo o proxecto promocional e terá tamén a participación da alcaldesa de Cambados, Fátima Abal que informará sobre as celebracións con motivo da Cidade Europea do Viño na súa localidade como referente do enotuirismo na provincia.

Pola súa banda, os promotores dos Festivais Rías Baixas, que estarán presentes no acto, adiantarán a maioría das actuacións nos seus respectivos carteis. Ademais proxectaranse os vídeos sobre os Camiños de Santiago ó seu paso pola provincia, sobre Cambados e o enoturismo, e sobre os propios RíasBaixasFests, e o evento rematará coa actuación en directo ao piano de Teo Cardalda. Como novidade tecnolóxica subliñar que os presentes poderán visualizar os vídeos con gafas VR e todo o acto será filmado cunha cámara de 360º.

A campaña “Moito por Descubrir” centra este ano as “razóns” de promoción de Rías Baixas no enoturismo, os festivais musicais, a excelencia turística e a ampla oferta das variantes do camiño de Santiago que pasan pola provincia de Pontevedra e a nosa contorna natural como un destino para descubrir.

Así, Cambados como Capital Europea do Viño, será o referente do enoturismo, coas rutas de visitas de bodegas e viñedos, as catas comentadas de caldos, a innovación na xestión de viñedos e bodegas ou o recoñecemento da muller no mundo do viño.

As variantes do camiño portugués a Santiago, o tradicional que pasa por Tui, ou a da costa que percorre dende A Guarda ate Pontevedra, a Vía da Prata, ou o camiño de Inverno que pasa por Lalín, pasando pola ruta do Padre Sarmiento e do Mar de Arousa e Río Ulla son os outros eixos que marcan a promoción turística. Unhas perfectas rutas para descubrir as rías baixas e todos os encantos da provincia de Pontevedra.

Por último os festivais musicais “Rias Baixas fest” que presentan as citas de Atlantic Fest (Illa de Arousa, 30 de xuño ao 2 de xullo), Cultura Quente (Caldas de Reis, 7 e 8 de xullo), Portamérica (Caldas de Reis, 14, 15 e 16 de xullo) , Sinsal Son Estrela Galicia (Illa de San Simón, 21, 22,e 23 de xullo), SonRías Baixas (Bueu, 3, 4 e 5 de agosto), Marisquiño (Vigo, 11, 12 e 13 de agosto), Revenidas (Vilagarcía 18,19 e 20 de agosto), Vive Nigrán (Nigrán, 28 e 27 de agosto) e a Festa da Cidade Europea do Viño (Cambados, 9 de setembro) compoñen a oferta de 8+1 de citas deste verán, que a Deputación promocionará a fondo como gran aposta cultural cun gran valor turístico engadido.

Deja un comentario