+034 986 09 02 04 Luns 20 de Agosto de 2018

FEIJÓO AFIRMA QUE A HUMANIZACIÓN DA RÚA PROGRESO CONTRIBUIRÁ A CONSOLIDAR O ATRACTIVO TURÍSTICO DE SANXENXO E O SEU PAPEL DE DESTINO DE REFERENCIA NAS RÍAS BAIXAS


Precisa que, cun investimento de máis de 2,5 millóns, se renovarán ademais os servizos de abastecemento, saneamento e iluminación e se rehabilitarán o pavimento e a sinalización necesaria
O presidente do Goberno galego, Alberto Núñez Feijóo, destacou que a humanización completa da rúa Progreso contribuirá, ademais de a mellorar a calidade de vida dos veciños, a consolidar o atractivo turístico de Sanxenxo e o seu papel de destino de referencia nas Rías Baixas.

Durante a sinatura do convenio de colaboración entre a Xunta e o Concello para a remodelación desta rúa, Feijóo precisou que, cun investimento total de máis de 2,5 millóns de euros, se renovarán ademais os servizos de abastecemento, saneamento e iluminación e se rehabilitará o pavimento e a sinalización necesaria.

Así mesmo, incidiu en que esta obra mellorará a fluidez do intenso tráfico que circula por esta vía e incrementará a seguridade, a accesibilidade e a integración urbana da rúa e o seu desfrute polos peóns, con beirarrúas máis anchas, aparcadoiros ordenados e xardíns.

Ao longo da súa intervención, Feijóo afirmou que o convenio asinado se enmarca dentro dunha alianza a prol dun turismo que, dunha banda, sexa respectuoso e sensible coas necesidades dos veciños e que manteña o atractivo deste lugar.

Neste compromiso, recordou que o Plan de sendas, co que a Xunta quere facilitar unha mobilidade alternativa ao coche a través de itinerarios seguros e integrados na paisaxe, ten na estrada PO-308 unha das súas maiores razóns de ser. Non en van, o treito de senda entre Soutullo e A Lanzada xa está finalizado e, nos próximos meses, culminaranse as obras ata Major, coa previsión de que o ano que vén estea completamente finalizada a conexión ata Portonovo.

Cun investimento de case 7 millóns de euros só en Sanxenxo, Feijóo aseverou que este proxecto, ademais de mellorar a seguridade viaria, achegará un novo valor turístico para este municipio.

Por último, resaltou que a Xunta está xa a traballar tamén nesta estrada para eliminar o treito de concentración de accidentes na zona do acceso á praia de Areas, cuxas obras se concretarán neste ano. Unha obra que forma parte do obxectivo da Xunta de eliminar os tramos de concentración de accidentes mellorando a seguridade viaria, co compromiso de que en 2020 todos estes tramos queden eliminados dos 5.000 km de estradas competencia da Comunidade.

Deja un comentario