+034 986 09 02 04 Domingo 19 de Agosto de 2018

PONTE CALDELAS INVITA AO VISITANTE A GOZAR DE TODOS OS SEUS RECURSOS TURÍSTICOS


Estréanse dous paneis interactivos con abundante información sobre as casas indianas, petróglifos, igrexas, roteiros e o río Verdugo
Hai tanto que ver en Ponte Caldelas que é fácil despistarse. Co ánimo de agrupar e reforzar a información turística que se achega ao visitante, o Concello en colaboración coa Deputación Provincial, vén de colocar dous paneis interactivos no comezo do paseo da Calzada e na entrada ao núcleo de Tourón, nos que é posible descargar boa parte da información relevante sobre os fitos do municipio.
Os paneis, que contan cun código QR ou Bidi, abren o acceso a unha “app” que constitúe un auténtico paseo virtual por algúns dos elementos turísticos máis atractivos de Ponte Caldelas. Uns contidos aos que tamén é posible acceder a través da Internet, pois creouse un apartado vinculado ao portal do Concello. Basta con teclear a dirección www.pontecaldelas.org/bidi.
O alcalde, Andrés Díaz, en representación do Goberno local (PSdeG-PSOE, AVP e BNG) xunto co arqueólogo Alberte Reboreda, responsable do proxecto, estreou o servizo e comprobou a calidade da información que achega.
Sorprende o gran volume de datos, perfectamente clasificados por apartados temáticos, incluíndo fotografías e localización xeográfica. Destacan os apartados dedicados á arquitectura indiana, ao río Verdugo, aos roteiros, ás igrexas, á Área Arqueolóxica de Tourón e tamén a algúns elementos tan singulares como o calvario de Barbudo.
O traballo, subliñou o alcalde, é unha auténtica guía turística de Ponte Caldelas pois as imaxes son de gran calidade e inclúense explicacións sinxelas sobre as características de cada un dos preto de 100 elementos visitables recompilados.
O catálogo de casas indianas inclúe fotografía e descrición de cinco inmobles na aldea de Anceu e doutras 11 no centro de Ponte Caldelas. A arquitectura de Ponte Caldelas está moi presente, tanto que os paneis contan cun logotipo, que será utilizado a partir de agora como imaxe de Turismo de Ponte Caldelas. A imaxe reproduce a filigrana existente na fachada dunha das casas indianas de Anceu.
A mellora foi financiada no marco das subvencións da Deputación Provincial para a rehabilitación e sinalización turística do patrimonio histórico-cultural, dirixidas a concellos da provincia. Nesta convocatoria Ponte Caldelas logrou unha achega de 8.071,52 euros.

Deja un comentario