+034 986 09 02 04 Luns 24 de Setembro de 2018

MEDIO AMBIENTE INVISTE MÁIS DE 6.000 EUROS NOS LABORES DE LIMPEZA E CONSERVACIÓN DO REGO DA CANCELA AO SEU PASO POR POIO


 Técnicos de Augas de Galicia dirixiron na primeira metade de agosto os traballos, que consistiron na roza das masas de matogueira, na retirada de árbores caídos e especies invasoras e na eliminación de atascos puntuais nun tramo da canle

A Consellería de Medio Ambiente e Ordenación do Territorio, a través do persoal de Augas de Galicia, vén de rematar unha serie de traballos de conservación e mellora do dominio público e das zonas de acceso e protección do Rego da Cancela, no concello pontevedrés de Poio.

Os traballos, que se prolongaron desde comezos de agosto ata a semana pasada, consistiron fundamentalmente na retirada de árbores caídas e de masas localizadas de Arundo donax, unha especie exótica invasora que pode desprazar á flora local e diminúe a capacidade de desaugue dos ríos. Así mesmo, tamén se traballou na eliminación de atascos puntuais, na roza selectiva dalgunhas masas de matogueira e no rareo de arbustivas.

O custo dos labores de mantemento e conservación acometidos na zona, que se focalizaron nun tramo de 125 metros do rego ao seu paso polas parroquias de A Seara e San Xoán de Poio, ascendeu en total a 6.218,64 euros.

Cómpre lembrar que estes traballos encádranse nas actuacións que ao longo do ano desenvolve Augas de Galicia para o mantemento, conservación e mellora do dominio público das bacías de Galicia-Costa co obxectivo de acondicionar os accesos e garantir a protección dos ecosistemas fluviais, así como asegurar a correcta circulación das augas. Así, con este tipo de intervencións o organismo de conca mellora os espazos de dominio público, a súa accesibilidade e a protección das marxes dos ríos da demarcación hidrográfica.

Deja un comentario