+034 986 09 02 04 Domingo 21 de Outubro de 2018

A ILLA DE ONS CONVÉRTESE EN PROTAGONISTA NO DÍA MUNDIAL DA ARQUITECTURA


O arquipélago de Bueu acolleu este luns un acto no que se percorreron algúns dos emblemas deste lugar, como o xacemento arqueolóxico de Canexol, a igrexa ou o camping

A Illa de Ons, un dos grandes emblemas culturais e medioambientais de Bueu, acolleu este luns o acto conmemorativo polo Día Mundial da Arquitectura, organizado polo Colexio Oficial de Arquitectos de Galicia (COAG) e o Concello de Bueu. A visita, cuxo obxectivo era informar sobre as diversas combinacións arquitectónicas deste espazo, estivo guiada polo arqueólogo Francisco Alonso, e nela participaron un total de 150 persoas. Manuel Abelleira, presidente da delegación de Pontevedra do COAG, destacou que “é preciso abrir unha reflexión sobre a acción do home no medio ambiente, e lograr a sostibilidade no mesmo”. Abelleira mostrouse agradecido por este novo acto que se celebra nun lugar de Bueu, xustamente dous anos despois do que tivera lugar na vivenda de La Roiba, en Beluso. Na mesma idea abondou Félix Juncal, alcalde da vila, quen destacou que “é preciso a cooperación de todas as institucións para que a nova sensibilidade no urbanismo sexa o instrumento de cara a conseguir o mundo mellor que desexamos, no que é moi importante a conservación e utilización polas persoas”.
A ruta comezou na igrexa, onde o arqueólogo fixo referencia a esa construción do barrio seguindo un modelo andaluz, para camiñar a continuación ata a praia de Canexol, onde as persoas asistentes puideron coñecer o xacemento arqueolóxico e aspectos relacionados coa construción singular das vivendas. Ao remate, os responsables da creación do proxecto do camping, explicaron que esta instalación se construíu segundo os conceptos de sostibilidade, e por iso toda a enerxía eléctrica é fotovoltaica, ademais de que a auga quente vén con captadores solares, e os materiais proveñen de madeiras autóctonas sen tratar. Un bo exemplo de como a sostibilidade e o urbanismo son compatibles.
Ao acto tamén asistiron outros concelleiros/as da corporación municipal, como Silvia Carballo, edil de promoción económica e turismo, Martín Villanueva, concelleiro de urbanismo, Teresa López, responsable de ensino e sanidade, Fidel Castro, de obras e servizos, Adrián Ferrer, de medio ambiente, Julio Villanueva, voceiro do grupo ACB-SON, ademais de Encarnación Rivas, Directora Xeral de Ordenación do Territorio e Urbanismo, e Maica Larriba, Subdelegada do Goberno en Pontevedra.

Deja un comentario