+034 986 09 02 04 Sábado 17 de Novembro de 2018

O CONCELLO DE BUEU REMATARÁ NAS VINDEIRAS SEMANAS DE INSTALAR OS PARQUES INFANTÍS


O Concello de Bueu segue puxando por infraestruturas que teñen como eixe vertebrador aos máis pequenos e pequenas. Por iso se están renovando e creando novos parques infantís e biosaudables en diversas zonas no marco dun proxecto financiado con cargo ao Plan Concellos 2017 da Deputación de Pontevedra, e que ten por obxectivo a adaptación dos espazos urbanos e rurais para o seu goce por parte do conxunto da cidadanía.
Así, a veciñanza xa pode gozar dos parques infantís da Antiga Escola Unitaria de Cabalo e na de Sanamedio, así como nos Xardíns de María Eugenia e na Praza do Concello, e nas vindeiras semanas rematarase o da Casa da Aldea de Meiro e o do Parque de Xexide, no Outeiro, que o alcalde da vila, Félix Juncal, visitou este venres. A este proxecto súmanse as diversas áreas de biosaudables que se instalaron no Parque Ramal dos Galos, en Pescadoira e no Paseo de Agrelo- Portomaior.
Ademais, outro dos espazos máis utilizados entre a poboación máis nova, como é o skate park sito nas Lagoas completouse coa instalación dun novo módulo.
O proxecto dos parques tiña un prezo total de licitación de 237.846,77€ , IVE incluído, aínda que se dividiu en tres lotes, correspondentes aos parques infantís, zonas biosaudables e skate park. No primeiro caso, adxudicouse a Bricantel SL por un importe de 144.895,48.-€. A mesma empresa resultou adxudicataria tamén do segundo, cun importe de 15.530,41.-€, e do terceiro, Zona de Obra O Rosal SLU, de 6.353,76.-€.
Comezo de obras
Por outra banda, o alcalde avanzou que na vindeira semana comezarán as obras de pavimentación do vial de baixada á praia de Area de Bon, a do Camiño da Cereixeira, en Trasouto, e a construción dun módulo de vestiarios masculinos na nave de deportes náuticos de Pescadoira. Estas actuacións acometeranse con cargo a remanentes do Plan Concellos 2016.

O camiño da Cereixeira, cuxo proxecto consta dun orzamento de 17.091,93 €, está situado no lugar de Graña e dado o seu mal estado procederase a unha actuación de pavimentación. Así mesmo, no vial de baixada á praia de Area de Bon, moi utilizado pola cidadanía sobre todo na época estival, tamén se vai acometer o seu arranxo. Esta actuación está valorada en 47.132,88 €, e o seu prazo de execución será dun mes. Tal e como apunta o rexedor, aproveitando a obra vaise pavimentar outro tramo sito en Bon de Abaixo, que se atopa xunto ao lavadoiro de Tomadelo.
Por último, na Nave de Deportes Náuticos de Pescadoira está programada a construción dun módulo de vestiarios para homes, que completará o xa existente de mulleres, e que incorporará duchas e aseos.
Tal e como consta no proxecto da obra, valorada en 46,270,17 €, a nave está dividida en dous: a parte situada ao Este está dedicada á restauración e construción de embarcacións tradicionais, e a Oeste ao deporte de remo nas súas diversas variedades, fundamentalmente remo en equipo. Na zona de vestiarios desta última zona construíuse un módulo de baños para mulleres fai un ano.

Deja un comentario