+034 986 09 02 04 Venres 07 de Agosto de 2020

UN VECIÑO DE SOUTOMAIOR ADESTRA CORVOS PARA COMBATER Á AVESPA VELUTINA


Tras retirar os niños e conxelalos para matar as adultas, dállos ás aves para que se alimenten das larvas
Alejandro Bua, o propietario dunha tenda agrícola en Arcade, está a probar un novo sistema para facer fronte á praga de avespa velutina, ensinar aos corvos salvaxes que os niños son unha fonte alcanzable de alimento. Aproveita a súa colaboración co Concello retirando niños para adestrar ás aves e probar a súa eficacia na loita contra a invasión deste insecto.
A idea xurdiulle o pasado ano cando, tras retirar varios niños, viu corvos salvaxes preto da súa casa e decidiu deixarlle un avispero xa baleiro para ver como reaccionaban. A súa sorpresa foi cando á mañá seguinte eran varios os corvos que se estaban alimentando das larvas.
A intención, declara Alejandro, é que unha vez recoñezan os niños como fonte de alimento, as propias aves repliquen este comportamento entre elas por imitación. “Os corvos son animais moi intelixentes, aprenden enseguida vendo aos seus compañeiros e son buenísimos seguindo rastros”, explicou Alejandro.
O método que utiliza Alejandro é simple. Tras a retirada dos niños máis alcanzables, nos que non é necesario utilizar biocidas, os garda nun saco pechado e déixaos unha noite no conxelador. “Isto mata as avespas adultas e deixa con vida as larvas, protexidas polo encapsulado”, explicou Bua, convertendo o niño nun manxar para as aves que, cámara tras cámara, esnaquizan e baleiran o avispero por completo.
Tras un ano adestrando ás aves, os resultados son prometedores. “Cada vez escóndolles máis os niños e os corvos seguen o rastro ata atopalo e comerllo. Nun ano ou dous xa haberá novas xeracións de corvos que identificarían os niños con comida por completo porque os comen desde que nacen”.
As vantaxes en caso de chegar a adestrar a estes animais son enormes, indicou Alejandro, porque ademais de ser unha defensa natural contra a velutina, “axudaríannos cun dos grandes problemas que temos retirando os niños, que é a altura. Aínda con drons, retirar un niño a máis de 25-30 metros é complicado e moi caro”.
Desde o Concello de Soutomaior aplauden a iniciativa nunha área “na que traballamos especialmente”, indicou o alcalde de Soutomaior, Agustín Reguera, que engadiu que “este ano levamos case 300 niños retirados, moitos grazas ao propio Alejandro, e que dan mostra da nosa preocupación e traballo para combater o máximo posible a praga da velutina”.

Deja un comentario