+034 986 09 02 04 Xoves 17 de Outubro de 2019

HERBA LUISA, MANZANILLERA E ROMEU PARA COMPROBAR A EFICACIA DO COMPOST


Mestras e mestres composteiros do Plan Revitaliza instalarán mañá venres unha carpa informativa sobre compostaxe na Praza da Peregrina

Mestras e mestres compostadores do Plan Revitaliza da Deputación instalarán mañá na Praza da Peregrina de 10 a 13 horas unha carpa informativa para dar información sobre a compostaxe á veciñanza e responder dúbidas sobre como se composta en centros comunitarios e composteiros individuais. Aquelas persoas que o desexen tamén poderán poñer a proba os seus coñecementos, participar nos xogos de preguntas e respostas, e recibir unha planta (herba luisa, manzanillera, romeu, rosmarinus ou semprevivas) para poder fertilizala con compost e comprobar a súa eficacia como fertilizante natural.

O punto informativo sobre compostaxe do Plan Revitaliza leva xirando pola provincia máis de dúas semanas e ata o de agora leva recollido unha grande receptividade. Son moitas as persoas que se achegaron para recibir información e apuntarse nos listados co fin de recibir un composteiro individual ou participar da compostaxe en centros comunitarios, algo que tamén poderán facer mañá na capital do Lérez.

O persoal técnico explicará todos os beneficios do modelo de xestión do lixo baseado na compostaxe para cumprir os obxectivos fixados na normativa europea, estatal e autonómica en canto a reutilización e reciclaxe. Lembrarán que é precisa a concienciación e colaboración da cidadanía porque a Unión Europea esixirá reciclar o 50% de todo o lixo en 2020 e compostar ou recoller en orixe separadamente os biorresiduos antes do 31 de decembro de 2023 de maneira obrigada.

A carpa informativa sobre o Revitaliza pretende impulsar a compostaxe en proximidade como un modelo de xestión do lixo ambientalmente sustentable, poñendo de relevo que compostar é dar unha nova vida aos residuos orgánicos para que volvan de novo á terra como fertilizante natural.

Deja un comentario