+034 986 09 02 04 Luns 01 de Xuño de 2020

Os gobernos locais poderán dispoñer de case 5.000 millóns do superávit de 2019 mediante Decreto Lei


  • O alcalde e presidente da FEMP, Abel Caballero, amosouse «satisfeito» polo compromiso adquirido polo Goberno de España este luns, nunha Comisión Nacional de Administración Local na que tamén se aprobaron os obxectivos de déficit, débeda e regra de gasto.

O Goberno comprometeuse a aprobar, coa maior urxencia, un Decreto Lei que autorice aos gobernos locais a utilizar canto antes os preto de 5.000 millóns de euros de superávit que estes alcanzaron en 2019. Con este compromiso da resposta positiva a unha das principais demandas da FEMP e así, en palabras do Presidente e alcalde de Vigo, Abel Caballero, “permitiranos maior capacidade de investimento canto antes empecemos a facelo”.

Así se acordou na mañá deste luns na reunión da Comisión Nacional de Administración Local (CNAL), celebrada no Ministerio de Política Territorial e Función Pública, baixo a presidencia da súa titular, Carolina Darias, e da Ministra de Facenda, María Jesús Montero, e coa participación dos representantes da Administración Local encabezada polo alcalde vigués e presidente da FEMP. Abel Caballero sinalou que “saímos satisfeitos” dunha reunión na que as Ministras subliñaron o relevante papel que xogan ás entidades locais na construción do Estado do Benestar.

Na CNAL, a primeira desta Lexislatura, e en liña coa formulación da FEMP, que pedía “flexibilizar a forma de facer esta autorización” de uso do superávit, prorrogaranse a máis dun ano as normativas que marcan o catálogo de Investimentos Financeiramente Sostibles -que ata o de agora se viñeron fixando con carácter anual-, unha cuestión que facilita aos consistorios o investimento nos seus territorios, segundo indicou o presidente, e que tamén abre a porta para destinar os superávits que os gobernos locais levan sumando desde fai oito anos a minimizar os danos ocasionados por temporais e catástrofes naturais, segundo detallou.

Ademais desta cuestión, na CNAL aprobáronse os obxectivos de déficit, débeda e regra de gasto, que quedaron fixados no 0%, o 1,9% sobre PIB e o 2,9%, respectivamente, tres valores que o tamén alcalde de Vigo considerou “perfectamente realizables” para os concellos.

Sobre o obxectivo de regra de gasto, pasouse dunha previsión inicial do 2,8% ao 2,9% finalmente aprobado. Con esta medida, idéntica á exposta ás Comunidades Autónomas, o executivo central busca minimizar o impacto do IVE de 2017. A xuízo de Caballero, a diferenza é que os gobernos locais dispoñen cos seus remanentes de recursos que poden utilizar. Nas súas declaracións aos medios asegurou que, con todo, a FEMP presentará ao Ministerio de Facenda unha proposta sobre IVE consensuada.

Outro dos temas abordados este luns na reunión foi o relacionado co gasto que os gobernos han de afrontar por ter os seus depósitos -máis de 25.000 millóns de euros- nas entidades bancarias. Desde a Federación propuxéronse diferentes fórmulas que o Goberno de España comprometeuse a estudar para responder canto antes.

Caballero tamén valorou positivamente a disposición do executivo para acelerar no Congreso dos Deputados a tramitación da normativa sobre plusvalías municipais para adaptala ás esixencias das sentenzas dos Altos Tribunais e acabar coa inseguridade xurídica neste ámbito.

Finalmente, segundo manifestaron tanto o presidente como as ministras, a reforma do financiamento local de maneira paralela e simultánea á reforma do financiamento autonómico mantense como compromiso da lexislatura.

Deja un comentario