+034 986 09 02 04 Sábado 15 de Agosto de 2020

44 concellos e tres mancomunidades contarán coa cita previa de atención cidadá grazas á ferramenta electrónica da Deputación de Pontevedra


Xa esta establecido o calendario para a formación do persoal para a xestión do sistema que poderá comezar a empregarse nas próximas semanas

Coa plataforma telemática da Deputación os concellos xa realizaron case un millar de reunións dos seus órganos colexiados durante os últimos dous meses

A Deputación de Pontevedra segue ao servizo dos concellos da provincia axudándolles a que se adapten ás esixencias sanitarias derivadas do COVID-19 mediante solucións de administración electrónica. Entre as últimas iniciativas do ente provincial atópase a posta en marcha nos concellos do sistema de cita previa para a atención á cidadanía que xa foi solicitado por 44 municipios de menos de 50.000 habitantes, adheridos á ferramenta electrónica da Deputación desenvolvida por Gestiona. Amais, tamén contarán con este sistema de cita previa as mancomunidades do Morrazo, do Salnés e do Val Miñor.

A mediados de maio levouse a cabo a presentación telemática do proxecto cunha gran acollida por parte dos concellos e as mancomunidades. Agora, coa lista de entidades interesadas, a Deputación de Pontevedra está a organizar un calendario formativo adaptado ás necesidades especificadas de cada unha delas para integrar o sistema de cita previa no día a día da súa administración. Prevese que todos os concellos e mancomunidades conten co sistema totalmente integrado nas vindeiras semanas.

Gracias a implantación desta ferramenta, a cidadanía que queira dirixirse ao seu concello ou mancomunidade para a realización dalgunha xestión terá a opción de facer clic na Cita Previa na sede electrónica, e na solicitude poderá elixir se a cita será presencial, telefónica ou por videoconferencia. Será a entidade quen decida que servizos e departamentos terán cita previa e como esixirá aos veciños e veciñas facer a súa reserva, se a través de certificado ou simplemente con cumprimentar un formulario. Así, as entidades tamén poderán organizar diferentes axendas (por exemplo para o rexistro, padrón ou para outros departamentos) e configurar diferentes franxas horarias de atención ao público. O novo servizo estará dispoñible a través de tablets e dispositivos móbiles.

Reunións telemáticas
Doutra banda, no mes de abril Deputación provincial facilitou aos 53 concellos adheridos á administración electrónica a celebración telemática das súas sesións colexiadas de xeito totalmente gratuíto. Ata o momento téñense celebrado un total de 910 reunións telemáticas gracias ás ferramentas proporcionadas polo ente provincial, das cales 51 foron certificadas, polo que contan validez legal.

Entre as accións que se poden levar a cabo de forma telemática grazas á plataforma da Deputación de Pontevedra atópanse reunións, plenos virtuais e mesas de contratación a distancia, así como traballo colaborativo entre persoal funcionario. Amais, o sistema, ao que se pode acceder a través de ordenadores e dispositivos móbiles, permite retransmisións en directo a través da propia sede electrónica ou plataformas nas redes sociais, garantindo unha maior transparencia.

Deja un comentario